Rom 3 | HUI | STEP | Ani biagadago Yu wali agalime wali agali tara tara karu bolangua holenaga mbira ngabe.Dongone podo mabu biagane mana galone mbira ngabe.

a 3.2Man 4.7-8, Iba 147.19-20, Lm 2.18, 9.4

b 3.3Lm 9.6, 10.16, 11.29, 2 Ti 2.13, Hi 4.2

c 3.4Iba 51.4, 62.9, Yo 3.33

d 3.5-6Lm 6.19, Ga 3.15

e 3.8Lm 5.20, 6.1, 6.15

f 3.9Lm 1.18—2.24, 3.23

g 3.10Aga 7.20

h 3.10-12Iba 14.1-3, 53.1-3

i 3.13Iba 5.9, 140.3, Ya 5.16

j 3.14Iba 10.7

k 3.15-17Min 1.16, Ais 59.7-8

l 3.18Iba 36.1

m 3.19Yo 10.34, Lm 1.20, 2.2, 3.9, 3.23

n 3.20Iba 143.2, Ab 13.39, Lm 7.7, Ga 2.16, Eb 2.8-9, Ta 3.5

o 3.21Ab 10.43, 15.11, 26.22, Hi 11.4, 1 Pi 1.10

p 3.22Lm 1.17, 10.12, Ga 2.16, 3.28, Kl 3.11

q 3.23Lm 3.9, 5.2, 11.32, Ga 3.22

r 3.24Lm 5.1, Eb 1.7, 2.8, Kl 1.14, 1 Ti 2.6, 1 Pi 1.18-19

s 3.25Ab 13.38-39, 17.30, Eb 1.7, Kl 1.20, Hi 9.15

t 3.27Lm 2.17, 2.23, 1 Ko 1.29-31, Eb 2.9

u 3.28Ab 13.38-39, Lm 3.20-22, 8.3, Ga 2.16

v 3.29Lm 10.12

w 3.30Man 6.4, Lm 4.11-12, Ga 3.8, 3.20, 3.28

x 3.31Md 5.17, Lm 8.4

Romans 3

1 Ani biagadago Yu wali agalime wali agali tara tara karu bolangua holenaga mbira ngabe.Dongone podo mabu biagane mana galone mbira ngabe. 2 E̱ wiaore bida ndobe. Mbira ogo Ngode Datagaliwabehanda ibunaga bi mana Yu wali agalime mo dunubia ho yu helo tihondo mini. ^a 3 Ani binigo ti marume Ngode Datagaliwabe mitangi bialu mini bilina nahenedane handarimayagua iname agua lami̱yabe. Ti ani birago hondowa Ngode Datagaliwabe ibuguabi mini bilina naholebira lolene ngabe. ^b 4 Ani ndoyago. Wali agali ti bibahendeme ke̱ hai haga kayaguabi Ngode Datagaliwabe ibu henene dege laabo haga kagoni. Anduane Homogonagambugani lo ngago ogo, ^c

Í̠na bi larego bibahende tigatiga hangu larili lalu walia holene nga.
Tigua í̠ baba godi lole manda biyagua í̠ bolanguaore holene nga,
lalu gilibu nga.

5 Iname ko beramagome Ngode Datagaliwabenaga tigabi bulene panigiore walia hayagua agi manda bibehe kamabe. Ngode Datagaliwabehanda iname ko birimagonaga pani ngiragola ibu nakarulape bira labehe holeberamabe. Dindi wali agalime bi laralidagua ogoni laro. ^d 6 Ani nalabeheore. Ngode Datagaliwabe ibu tigabiore ndo kayagua ibugua wali agali bibahende agua mo daba ki bulebe.

7 Anidago i̱naga ke̱ holeneme Ngode Datagaliwabenaga henene lolene ngago panigiore walia helo lowa emene bogo para halu berogola Ngode Datagaliwabe ibunaga mini mo yaraga hayagua i̱ ko biaganaga pani nolene irane aginagadabe. 8 Ogonidagua manda bu kamayagua Ngode Datagaliwabenaga mini mo yaraga holene wilo ina ko bima lolene ngabe. Wali agali marume, Polohanda ani lalu ka, lowa i̱ mege biya. Ani biragonaga ti pani nolene ngadagua nolebiraore. ^e

Wali agali mini tigabiwi mbira naheorego ogo

9 Anidago wali agali tara tara karu ale ndo ina Yu wali agali bayale kamabe. Ani nalabeheore. Ina Yu wali agali kamarubi wali agali tara tara karubi ta nabi ina bibahendeore kome bope hai henego kama lalu abale langirugoni. ^f 10 Anduane Homogonagambugani lo ngago ogo, ^{g
,} ^h

Wali agali mini tigabiwi mbira naheore.
11 Mini bayale gigabiwi hagabi
Ngode Datagaliwabe mini yaraga hoa hagabi mbira naheore.
12 Wali agali bibahendeme Ngode Datagaliwabe erembira mialu piai haga ka.
Ti bibahende habane nabulene hangu bu hama peda.
Bayale biaga mbirali naheore.
13 Tigua wali agali homelonaga bi lahondo hagabi ⁱ
tinaga hégeme ke̱ gibi hagabi
homelo bolene bi puya tomia palego ale tinaga ne hambuha howa tagira ibagabi
14 ha hiriribiore holene tinaga ne harigaha to̱laihebi ka. ^j
15 Tigua wali agali mo tandaga holebi homelo bolebi abale manda biaga ka. ^k
16 Ti poragoha pialu ko dege bima puabo haga ka.
17 Mo palia holenaga bulene mbira manda nabiniore ka.
18 Ngode Datagaliwabehondo mogolo holenebi manda nabiore ka, ^l
lalu gilibu nga.

19 Mana lowinigo bibahende ngago wali agali mana ogoni andaneha karunaga lo nga manda bu kama. Ani manda buwa wali agalime, Ina Mana ogoni manda nabi harima, nalelonaga Ngode Datagaliwabehanda wali agali dindi bibahendeni karunaga dabagane helo Mana ogoni ngagome walia ho ngagonigo manda bu kama. ^m 20 Anigo mbiralime Mana lowinigo ogonime, Bibe, lo ngadagua biai hayagua Ngode Datagaliwabehanda ibu mini tigabiwi ka nalaga ka. Mana lowini ngagome ledago ogo, Wali agali ta nabi ko biaga kami, lalu walia ho nga. ⁿ

Kerisohondo mini mbiraorewi kago hondowa Ngode Datagaliwabehanda, Í̠ mini tigabiwi ke, lagago ogo

21 Anigo áyu ogoni Ngode Datagaliwabehanda wali agali agua biragola mini tigabiwi ke laganegonaga hariga walia ho nga. Ogoni lalu mana bulene lo ngagome bulene mbira ogoniha nawiore. Mosese heneyangiMana lowini ngagomebi Ngode Datagaliwabe manalatagi hagarumebi hariga ogoni walia henego nga. ^o 22 Ani binigo Yasu Kerisohondo mini mbiraore wu kago hondowa Ngode Datagaliwabehanda wali agali ogoni ibu mini tigabiwi ka laga ka. Wali agali bibahende Yasu Kerisohondo mini mbiraore wu karu tihondo Ngode Datagaliwabehanda ani laga ka. Ina wali agali bibahende ta nabi ko birimagome ina pele ngulene Ngode Datagaliwabe kagoria kaundiaore kama. ^{p
,} ^q 24 Ani bu kamagonaga Ngode Datagaliwabehanda Keriso Yasuha howa ibunaga biamogo bia holene turu halu bame ngiragome mini tigabiwi ke laga ka. Keriso Yasu ibugua ti golope haga ka. ^r 25 Keriso Yasu ibu homaragome ina wali agalinaga ko domolene henge wilo lowa Ngode Datagaliwabehanda ibu loma bia ho hene. Kerisohondo mini mbiraore wirarunaga ko Ngode Datagaliwabehanda domo wahelo ani loma bia ho hene. Ibugua ani binidagoni irane ibu mini tigabi kago walia holenaga ani bini. Alaore wali agalime ko biyago hondowa Ngode Datagaliwabehanda la nabi ibu mini timbuniwi howa ema nabi hene. Ai áyungi Ngode Datagaliwabehanda ibunaga tigabi holene walia halu wali agali bibahendeme ko birimaru ala nale henego áyu lalu ka. Ibugua ogonidagua bialu ibuni tigabiore ko lalubi Yasuhondo mini mbiraorewi karuhondo, Tí mini tigabiwi kami, lalubi walia haga ka. ^s

27 Anidago ina mine aginaga holebe. Mine holene irane nawiore. Nawioredago irane agibe. Mana lowini ngagome, Bibe, ledadagua wali agalime biaganagabe. Ogoninaga ndo. Iname Yasuhondo mini mbiraore wu kamagonaga hangu. ^t 28 Wali agalime Mana lowini ngagome, Bibe, lo ngadagua biai haragola ndo tigua Yasuhondo mini mbiraore wu kagola hangu Ngode Datagaliwabehanda, Tí tigabiwi kami, laga kago manda bidama. ^u 29 Be Ngode Datagaliwabe ibu Yu wali agalinaga hangu kabe. Ibu wali agali tara tara karunagabi kagoni ndobe. Aniorego ibu bibahendenaga Ngode Datagaliwabe kagoni. ^v 30 Ti bibahendenaga Ngode Datagaliwabe mbiraore ibuni dege kago ibugua Yu wali agalibi wali agali tara tarabi bibahende ta nabi Yasu Kerisohondo mini mbiraore wu karuhondo, Tí mini tigabiwi kami, laga ka. ^w 31 Ani biagadago iname mini mbiraore wulene ogoni mo tene halu Mana lowini ngago mo waharamabe. Ani nalabeheore. Iname ani beramagome Mana lowini ngago mo hongo harama. ^x